മ്യാന്മറിലെ അറാക്കാനിലുണ്ടായ പുതിയ സംഭവ വികാസങ്ങളുടെ പരിണിതിയെന്നോണം 90,000 ത്തോളം റോഹിങ്ക്യന്‍ മുസ്‌ലിംകള്‍ ബംഗ്ലാദേശിലേക്ക് പ്രവഹിക്കുകയാണ്. അതില്‍ 30,000 ത്തോളം പേരിപ്പോഴും അതിര്‍ത്തി പ്രദേശങ്ങളില്‍ കുടുങ്ങിക്കിടക്കുകയാണ്. ഇതിനിടയിലാണ് ബഹുമാനപ്പെട്ട പ്രധാന മന്ത്രി മ്യാന്‍മറില്‍ പോയി 40,000 അഭയാര്‍ത്ഥികളെ തിരിച്ചയക്കുമെന്ന് പ്രഖ്യാപിച്ചിരിക്കുന്നത്. ഇതിനെതിരെ ഡല്‍ഹിയിലുള്ള രണ്ട് മനുഷ്യസ്‌നേഹികള്‍ സമര്‍പിച്ച ഹരജി സുപ്രീം കോടതിയുടെ പരിഗണനയിലാണ്.
റോഹിങ്ക്യന്‍ മുസ്‌ലിംകളുടെ സ്ഥിര സാന്നിധ്യം രാജ്യത്ത് ഇസ്‌ലാമിക മതതീവ്രവാദത്തിന് വഴി വെക്കുമെന്നാണ് ഗവണ്‍മെന്റിന്റെ പിന്തിരിപ്പന്‍ നിലപാടിനെ പിന്തുണക്കുന്നവര്‍ വാദിക്കുന്നത്. മ്യാന്‍മര്‍ പ്രതിസന്ധി ഇന്ത്യയില്‍ ഭീകരവാദ ഭീതി വിതക്കുന്നുവെന്ന തരത്തിലുള്ള പ്രചരണങ്ങള്‍ ചില ഇന്ത്യന്‍ പത്ര മാധ്യമങ്ങള്‍ ഏറ്റെടുത്ത് നടത്തുകയും ചെയ്യുന്നുണ്ട്.
പക്ഷേ, അഭയാര്‍ത്ഥികളെ ഇരുകയ്യും നീട്ടി സ്വീകരിക്കുന്ന പാരമ്പര്യമുള്ള ഇന്ത്യാ രാജ്യം ഒരു സമൂഹത്തെ അവരുടെ ജാതിയുടെയോ മതത്തിന്റെയോ പേരില്‍ മാത്രം നാടുകടത്തുക എന്നത് തീര്‍ത്തും അപലപനീയം തന്നെയാണ്.
 | |
| കൊല്‍ക്കത്തയിലെ മ്യാന്‍മര്‍ എമ്പസിക്ക് മുന്നില്‍ പ്രതിഷേധിക്കുന്ന വിദ്യാര്‍ത്ഥി |
ഇന്ത്യയുടെ അഭയാര്‍ത്ഥി നയം
1971 ലെ യുദ്ധം വിതച്ച കെടുതികളില്‍ നിന്നും മുക്തി നേടാന്‍ ഇന്ത്യന്‍ ഉപഭൂഖണ്ഡത്തിലേക്ക് ബംഗ്ലാദേശില്‍ നിന്നും അഭയാര്‍ത്ഥികളുടെ വലിയ തോതിലുള്ള ഒഴുക്കുണ്ടായതിനെ തുടര്‍ന്നാണ് രാജ്യം ആദ്യമായി അഭയാര്‍ത്ഥി നിയമം രൂപീകരിക്കുന്നത്. അത് വരെ .UNHCR (United Nations High Commissioner for Refugees).....ന്റെ നിര്‍ദേശങ്ങളായിരുന്നു ഭാരതത്തിന്റെ അഭയാര്‍ത്ഥി നയം.
ഓരോ വര്‍ഷവും 150,000 മുതല്‍ 200,000 വരെ അഭയാര്‍ത്ഥികള്‍ ഇന്ത്യന്‍ ഭൂമിക തേടി വരുന്നുണ്ടെന്നാണ് യു.എന്‍ ഔദ്യോദിക കണക്ക്. 1947 ലെ വിഭജനം, 1959 ലെ തിബത്ത് പ്രതിസന്ധി, 1971 ലെ ബംഗ്ലാദേശ് രൂപീകരണം, ശ്രീലങ്കയിലെയും അഫ്ഗാനിസ്ഥാനിലെയും യുദ്ധങ്ങള്‍ തുടങ്ങിയവ അഭയാര്‍ത്ഥികളാക്കിയ രണ്ട് മില്ല്യന്‍ ജനങ്ങള്‍ ഇന്ത്യയില്‍ ജീവിക്കുന്നുവെന്നാണ് 2014 ആദ്യത്തില്‍ യു.എന്‍ റഫ്യൂജി ഏജന്‍സി പുറത്ത് വിട്ട കണക്ക്. പരാധീനതകളനുഭവിക്കുന്ന അയല്‍പക്കങ്ങളില്‍ നിന്ന് മാത്രമല്ല, ആഫ്രിക്കന്‍ മധ്യേഷ്യന്‍ രാഷ്ട്രങ്ങളില്‍ നിന്ന് പോലും അഭയം തേടി ജനങ്ങള്‍ ഇന്ത്യയിലെത്തുന്നു. കോന്‍ഗോ, എറിട്രിയ, ഇറാന്‍, ഇറാഖ്, നൈജീരിയ, റാവണ്ട, സോമാലിയ തുടങ്ങിയ രാഷ്ട്രങ്ങളില്‍ നിന്നുള്ളവര്‍ അഭയാര്‍ത്ഥികളായി ഇന്ത്യയില്‍ കഴിയുന്നു.
മതാടിസ്ഥിത വിവേചനം
തുടര്‍ച്ചയായുണ്ടാവുന്ന ഈ അഭയാര്‍ത്ഥി പ്രവാഹം നിയന്ത്രണ വിധേയമാക്കാനെന്ന പേരിലാണ് ഇന്ത്യ 1955 ലെ പൗരത്വ നിയമം കഴിഞ്ഞ വര്‍ഷം ഭേദഗതി ചെയതത്. മുസ്‌ലിംകളല്ലാത്തവര്‍ക്ക് പുതിയ നിയമ പ്രകാരം ഇന്ത്യന്‍ പൗരത്വം നിഷ്പ്രയാസം ലഭിക്കുന്ന ഒന്നായി മാറി. അഫ്ഗാനിസ്ഥാന്‍, പാകിസ്ഥാന്‍, ബംഗ്ലാദേശ് തുടങ്ങിയ മുസ്‌ലിം ഭൂരിപക്ഷ പ്രദേശങ്ങളില്‍ നിന്നും കുടിയേറുന്ന അമുസ്‌ലിം അഭയാര്‍ത്ഥികളാണ് ഈ നിയമത്തിന്റെ യഥാര്‍ത്ഥ പ്രായോജകര്‍. എന്നാല്‍ ബുദ്ധ തീവ്രവാദികളുടെ കറുത്ത കരങ്ങളില്‍ നിന്ന് രക്ഷ തേടിയെത്തുന്ന മുസ്‌ലിം അഭയാര്‍ത്ഥികളെ പുതിയ നടപടി പ്രതികൂലമായി ബാധിക്കുന്നു. രാജ്യത്തെ 9200 അഫ്ഗാനിസ്ഥാന്‍ അഭയാര്‍ത്ഥികളില്‍ 8500 പേരും ഹൈന്ദവരാണ്. ഇന്ത്യയുടെ തന്ത്രപ്രധാന നഗരങ്ങളില്‍ 400 പാകിസ്ഥാനീ ഹൈന്ദവ ക്യാമ്പുകളുണ്ടെന്നാണ് കണക്ക്. മാത്രമല്ല, ബംഗ്ലാദേശിലെ ബുദ്ധ വിഭാഗമായ ചക്മാക്കകളും ഈ നിയമത്തിന്റെ ആനുകൂല്യം പറ്റുന്നവരാണ്.
 | |
| UNHCR നല്‍കിയ ഐ.ഡി കാര്‍ഡ് ഉയര്‍ത്തിക്കാണിക്കുന്ന റോഹിങ്ക്യന്‍ അഭയാര്‍ത്ഥി |
പുറം തള്ളപ്പെടുന്ന മുസ്‌ലിംകള്‍
മുസ്‌ലിം ന്യൂനപക്ഷം സര്‍വ മേഘലകളിലും അടിച്ചമര്‍ത്തലുകള്‍ക്കും അനീതിക്കുമിരയാവുന്നവരാണ്. ബംഗ്ലാദേശിലും പാക്കിസ്ഥാനിലും അഹ്മദിയ്യാ മുസ്‌ലിംകള്‍ പീഢിപ്പിക്കപ്പെടുന്നത് പോലെ അഫ്ഗാനിസ്ഥാനിലും പാക്കിസ്ഥാനിലും ഹസാരസകള്‍ പീഢിപ്പിക്കപ്പെന്നു. മ്യാന്‍മറില്‍ ബുദ്ധ തീവ്രവാദികളും മുസ്‌ലിം ന്യൂനപക്ഷത്തിന് മേല്‍ സംഹാരതാണ്ഡവമാടുന്നു. ശ്രീലങ്കയില്‍ ബുദ്ധ മത വാദികള്‍ തമിഴ് മുസ്‌ലിംകളുടെ സര്‍വോന്മൂലനത്തിന് ശക്തമായ ശ്രമങ്ങള്‍ നടത്തുന്നു.
ഇവിടങ്ങളില്‍ നിന്നെല്ലാമുള്ള മുസ്‌ലിംകള്‍ ഇന്ത്യയുടെ പ്രവിശാലമായ മണ്ണിലേക്കാണ് അഭയം തേടിയെത്തിയത്. എന്നാല്‍ ഇന്ത്യന്‍ ഭരണകൂടം ആവിശ്കരിച്ച പുതിയ നിയമം ഇവരെ ആശങ്കയുടെ നീര്‍ക്കയത്തിലേക്ക് തള്ളിയിടുന്നു. UNHCR അംഗീകരിച്ച 14000 പേരെ വരെ അനധികൃതമെന്ന് മുദ്ര കുത്തി തിരിച്ചയക്കാനനുവദിക്കുന്നതാണ് പുതിയ അഭയാര്‍ത്ഥി നയം.
വര്‍ഗ, ജാതി, മത, ലിംഗ, ദേശ, ഭാഷ ഭേദമന്യേ സമത്വത്തിനുള്ള അവകാശം ഉറപ്പ് നല്‍കുന്ന ആര്‍ട്ടിക്ള്‍ 14 ന്റെ വ്യക്തമായ ലംഘനമാണ് ഇന്ത്യ നടപ്പിലാക്കുന്ന പുതിയ നിയമം. കൂടാതെ ഭരണഘടനാ പരമായ പല മൗലികാവകാശങ്ങളും കാറ്റില്‍ പറത്താന്‍ ഈ നിയമം സഹായകമാവുന്നുവെന്നതും പ്രസ്താവ്യമാണ്.
ശ്രീലങ്കയില്‍ നിന്നും തിബത്തില്‍ നിന്നും കുടിയേറിയ അഭയാര്‍ത്ഥികള്‍ക്ക് നല്‍കുന്ന പരിരക്ഷയോ പരിഗണനയോ ഫലസ്ഥീനില്‍ നിന്നും സോമാലിയയില്‍ നിന്നും മ്യാന്‍മറില്‍ നിന്നും അഭയം തേടിയെത്തുന്ന മുസ്‌ലിംകള്‍ക്ക് ലഭിക്കാറില്ലെന്നത് ഈ വാദത്തിന് അടിവരയിടുന്നു.
റോഹിങ്ക്യകളെ പോലെ അവശതകളനുഭവിക്കുന്ന ആയിരക്കണക്കിന് ജനങ്ങളെ നാടുകടത്തിയെന്ന ദുഷ്‌പേര് സമ്പാദിക്കുന്നതിന് പകരം സൗത്ത് ഏഷ്യന്‍ രാഷ്ട്രങ്ങള്‍ നല്ല മാതൃകയാവാന്‍ ഇന്ത്യക്ക് സാധിക്കണം. അഭയാര്‍ത്ഥി പ്രശ്‌നത്തില്‍ മതാടിസ്ഥിത നിയമത്തിന് പകരം ദുരിതമനുഭവിക്കുന്ന ലോകത്തെ മുഴുവന്‍ ജനതക്കും അഭയം നല്‍കാന്‍ തങ്ങള്‍ തയാറാണെന്നാണ് ലോകത്തെ ഏറ്റവും വലിയ മതേതര ജനാധിപത്യ ബഹുസ്വര രാജ്യം പ്രഖ്യാപിക്കേണ്ടത്.
Nafees Ahmad, Assistant Professor, International Refugee Law & Human Rights, South Asian Universtiy
കടപ്പാട് http://theconversation.com/as-rohingyas-flee-myanmar-india-needs-to-drop-religious-criteria-in-its-refugee-law-79648
